التسويق الالكترونى على جوجل 

التسويق الالكترونى على جوجل بقي موضوعه مختلف شوية 

هنبدأ فى الموضوع زى ما بدأنا فى اللى فات

 الاول لازم نفهم كويس  المنصة  اللى هنعلن عليها اللي هى جوجل ,طيب زى ما اتعودنا ايه هى المنصة دى ومين الناس اللى عليها والناس اللى عليها دول بيعملو ايه؟

1- ايه هى المنصة دى ؟

دى بقى يا معلم قصة كبيرة هى عبارة عن ان جوجل بتحاول تجمع كل معلومات العالم وتعملها على شكل فهرس انت تسال فى اللى انت عايزه وهى تجبلك من المعلومات اللى متخزنة عندها والوصف بتاعها الحرفى هو انها محرك بحث يعنى انت بتدور على ايه وهى تجيبلك المعلومة لحد عندك من الداتا المتخزنة عندها 

2- مين الناس اللى عليها ؟

بكل شفافية ومن غير اى مجاملة للمعلم الكبير جوجل اقدر اقولك كل الناس سواء اللى معاها موبايل ونت او كمبيوتر منزلى ونت وكمان من مختلف الاعمار

3- الناس اللى عليها دول بيعملو ايه ؟

المرة دى بقى هقولك كلام مفرح الناس اللى عليها بتسأل جوجل على كل حاجة حتى منتجك وخدمتك برضو الناس فى جوجل بتدور عليها ومش عارفة تجيبها منين
 شوفت بقى يعنى انت معاك المنتج او الخدمة وبتدور على العملاء والعملاء فى الناحية التانية بتدور على المنتج بتاعك وانت مش يتظهر ليهم لانك مش مهتم بالموقع والاعلانات على جوجل تخيل بقى 

بعد بقى ما عرفنا اهمية اعلانات جوجل نشوف بقى مع بعض المفروض اعمل اعلانات جوجل ازاى و ايه المتطلبات 
الاول عشان تعمل اعلانات جوجل وتستفيد منه  بأفضل طريقة ممكنة

لازم يبقى عندك موقع الكترونى وموقع كويس وسريع ومؤهل SEO

 طبعا هتسألنى يعنى اية SEO هقولك متغيرش الموضوع بموضوع اكبر منة  كتير وهنقف عندة اكتر وخلينا فى موضوعنا ولما تحتاج تهمل seo ممكن يبقى فى مقالات تانية جاية 
خلاص عملنا الموقع ندخل بقى على الاعلانات الممولة على جوجل 

وانت بتعمل اعلان ممول على جوجل

 اول حاجة لازم تهتم بيها جدا هى اختيارك للكلمات البحثية ودة موضوع كبير بيحتاج منك انك تنسى تماما انك صاحب المنتج وتفكر لو انت اللى هتشترى المنتج دة او الخدمة دى ممكن تدور عليها ازاى 
وكمان فية عوامل بتساعدك كتير عشان تعرف الكلمات البحثية دى الناس بتدور عليها ازاى وكمان احصائيات بعدد الناس اللى بتدور على المنتج دة فى جوجل كل دة موجود فى مواقع بأشتراكات وسعرها عالى شوية ولكن فية بديل قوى 

وببلاش كمان يا عم عشان متزعلش وهو اداة تخطيط الكلمات البحثية على google adword 
دى بقى اداة بتساعدك فى اختيارات كلمات البحث وكمان بتقولك عدد الناس اللى بتدور على نفس الكلمة وكمان بتقولك توقعات لعدد النقرات اللى هتجيلك بالبادجت اللى انت هتحطة فى الاعلان 
يعنى متهيألى شغل نضيف قوى 

تانى حاجة فى الاعلان هى انك بتختار المنطقة والجمهور اللى انت عايز لما يدور على جوجل انت تظهر 

ثالث حاجة بقى هى صيغة الاعلان الممول على جوجل 

وانت بتعمل صيغة الاعلان الممول تكون واضح جدا وتحاول تجذب العملاء لاعلانك بالعرض او الخصم اللى موجود عشان العميل يتشد لاعلانك انت , دونا عن باقى المنافسين وتحاول تعرض المميزات اللى عندك فى صيغة الاعلان

 يعنى مثلا لو انت مطعم وعندك مساحة كويسة لركنة العربيات وضح فى صيغة الاعلان ان عندك مساحة للركنة لان دى بتبقى ميزة للعملاء اللى جايين ليك 

ولو مثلا عندك خدمة التوصيل للمنزل من الافضل برضو انك توضح دة فى صيغة الاعلان 

وغيره زى مثلا لو عندك ميزة التقسيط  برضو من الافضل انك توضح دة فى الصيغة 
كل ده انت بتعمله عشان العميل لما تظهرله نتائج  لعملاء اخرين يختارانه يدخل على موقعك انت وده بيعلى من جودة اعلانك 
وبيحقق المبيعات اللى انت اصلا تعبت نفسك وقريت المقالين كاملين عشان تزودها فبلاش تضيع وقت اكتر من كده 
واتفضل بقى نفذ حملاتك وزود مبيعاتك .